童謠——鷄公仔

鷄公仔

鷄公仔,尾彎彎,做人新婦甚艱難!

早早起身都話晏,眼淚唔乾入下間,

下間有個冬瓜仔,問安人老爺煮定蒸,

安人又話煮,老爺又話蒸,

蒸蒸煮煮唔中安人老爺意,

大把拉鹽又話淡,手甲挑鹽又話鹹,

三朝打爛三條夾木棍,四朝跪爛四條裙!

咁好花裙畀你跪爛,咁好石頭畀你跪崩!

橫又難,直又難,

不如捨命落陰間!

人話陰間條路好,我話陰間條路好艱難!

童謠——年卅晚,買檳榔

年卅晚,買檳榔

月光光,照地堂,年卅晚,買檳榔,

檳榔香,買紫薑,紫薑辣,買芙薘,

芙薘苦,買豬肚,豬肚肥,買牛皮,

牛皮薄,買菱角,菱角尖,買馬鞭,

馬鞭長,買屋樑,屋樑高,買把刀,

刀切菜,買鑊蓋,鑊蓋圓,買條船,

船頭高,船尾矮,浸死兩個番鬼仔,

一個浮頭,一個浸底。