鷄公仔

鷄公仔，尾彎彎，做人新婦甚艱難！

早早起身都話晏，眼淚唔乾入下間，

下間有個冬瓜仔，問安人老爺煮定蒸，

安人又話煮，老爺又話蒸，

蒸蒸煮煮唔中安人老爺意，

大把拉鹽又話淡，手甲挑鹽又話鹹，

三朝打爛三條夾木棍，四朝跪爛四條裙！

咁好花裙畀你跪爛，咁好石頭畀你跪崩！

橫又難，直又難，

不如捨命落陰間！

人話陰間條路好，我話陰間條路好艱難！ 

年卅晚，買檳榔

月光光，照地堂，年卅晚，買檳榔，

檳榔香，買紫薑，紫薑辣，買芙薘，

芙薘苦，買豬肚，豬肚肥，買牛皮，

牛皮薄，買菱角，菱角尖，買馬鞭，

馬鞭長，買屋樑，屋樑高，買把刀，

刀切菜，買鑊蓋，鑊蓋圓，買條船，

船頭高，船尾矮，浸死兩個番鬼仔，

一個浮頭，一個浸底。