粵語俗語典故(一)

“放飛機” 嘅由來

何為放飛機呢?話說舊香港。有一日,就要上演飛機飛行。系香港有史以來第一次有飛機睇!仲要係部水上飛機添!全香港萬眾期待:有人要放飛機睇啊!第一日到來,因為打風,冇得開,眾人失望而歸;第二日,天朗氣清,各人以為有嘢睇,點知個飛機師病咗,要推到第三日。而第三日呢,到部機個引擎出事,修理唔到。跟住就——bye bye喇!
所以啲人就用放飛機嚟形容講咗去做,又唔做嘅人嘅行為嘞!

“巴閉”嘅由來

“巴閉”來自廣洲話,好耐好耐以前系學習自印度話,漢朝既時候廣洲已經同東南亞及中東等國家人民做生意, D 印度商人好鬼嘈,成日叫:” BAP RE, BAP RE!”,呢句嘅意思系”我的天呀!”,於是廣洲人就學佢地咁講,講下講下就變成今日嘅”巴閉”喇!

“混吉” 既由來

原來係因為以前既小型飯店,只要你去幫襯就會免費奉送一碗清湯,飯店每日所售嘅雞鴨鵝豬牛肉,都係用呢一鍋水整熟既,所以湯入面有肉味,然後落一堆味精,就係一碗清湯啦!因為系清湯,所以入面乜料都冇,即係空空如也,香港人覺得”空”等於” 兇”,所以就改成”吉”,所以碗湯就叫做”吉水”。
當時,有好多窮人,入到飯店,一坐低,夥記就摞一碗”吉水”嚟,D 窮人一口氣飲完,靜雞雞就走左去,因為呢碗湯系免費,所以飯店唔可以捉佢,所以夥記就叫呢種混騙嘅行為叫做”混吉”!

发表评论

电子邮件地址不会被公开。 必填项已用*标注